![](uploads/news/6536b652a8e9d9.17759789.jpg)
ჩვენი რესპონდენტი ნორვეგიიდან საქართველოში 11 წლის წინ ჩამოვიდა და სვანეთში დასახლება გადაწყვიტა. რიჩარდ ბაერუგი, დღეს სვანეთში, სოფელ ბეჩოში, ძმებ არღვლიანებთან ერთად სასტუმრო “USHBA GRAND HOTEL”-ის მეწილეა და სტუმრებს ისეთი ქვეყნებიდან მასპინძლობს, როგორებიცაა აშშ, შვეიცარია, ავსტრია და ა.შ.
როგორც BM.GE-სთან ბაერუგი ყვება, მის სასტუმროში ჩასულ დამსვენებლებს ის სვანეთის ტურებსაც სთავაზობს. მისი თქმით, იმისთვის, რომ სვანეთის სოფლები კიდევ უფრო მეტად ცნობილი გახდეს და სოფლად მცხოვრებ ადამიანებს შემოსავლის წყარო გაუჩნდეს, სოფლების პოპულარიზაცია უნდა ხდებოდეს.
ზუსტად ამიტომ, ბაერუგმა ტურისტებისთვის ე.წ გზამკვლევის შექმნა გადაწყვიტა, რაშიც ევროკავშირის, ავსტრიისა და შვედეთის დაფინანსებული პროექტი “GRETA” დაეხმარა.
“ვცადეთ და მივიღეთ დაფინანსება, რითაც დაიბეჭდება ახალი წიგნი, რომელიც გააერთიანებს როგორც სვანეთის ისე ზემო რაჭის სალაშქრო მარშრუტებს. ვფიქრობ, ამ პროექტს ექნება კონკრეტული შედეგი რეგიონში ტურიზმის განვითარებაში, განსაკუთრებით კი მცირე სოფლებისთვის" - ამბობს სასტუმრო უშბას თანადამფუძნებელი რიჩარ ბაირუგი.
როგორც ის ამბობს, პირველ ეტაპზე წიგნი, რომელიც მისი ავტორობით გამოიცა, ტურისტული მარშრუტები გააერთიანა. რიჩარდ ბაერუგის ე.წ. გზამკვლევმა, რომელმაც როგორც სვანეთის ისე ზემო რაჭის ამ დრომდე არც თუ ისე ცნობილი მარშრუტებზე ინფორმაცია ტურისტებისთვის ხელმისაწვდომი გახადა, დონორების მხარდაჭერით იბეჭდება.
ევროკავშირის, ავსტრიისა და შვედეთის მხარდაჭერილ პროექტ “GRETA”-ს დახმარებით, ჯამში, 120 სალაშქრო მარშრუტი ერთ წიგნში გაერთიანდა.
“ინფორმაცია არის უმნიშვნელოვანესი, რამაც უნდა მოიზიდოს ტურისტი სვანეთში. პროფესიულად შესრულებული გზამკვლევი, დასურათებული, რუკებით და ყველა იმ რესურსის აღწერით, რომელიც ამ რეგიონს გააჩნია მგონია, რომ არის ძალიან მნიშვნელოვანი. მითუმეტეს მაშინ, როცა ეს გზამკვლევი ხელმისაწვდომი საზღვრებს გარეთაც იქნება", - აცხადებს ირაკლი კუცია პროექტ "GRETA"-ს მენეჯერი მდგრადი ტურიზმის განვითარების მიმართულებით.
ევროკავშირის, ავსტრიისა და შვედეთის თანადაფინანსებულ პროექტ “GRETA” საქართველოში მაღალმთიან რეგიონებში მდგრადი ტურიზმის განვითარებას უწყობს ხელს. პროექტის ფარგლებში სათავგადასავლო ტურიზმით დაინტერესებული პირებისთვის ორი მნიშვნელოვანი ტრენინგი უკვე ჩატარდა. მონაწილეები გადამზადდნენ როგორც საფეხმავლო ბილიკების მარკირების, ისე მისი მოვლა-პატრონობის ნაწილში.
ასევე პროექტის მიმდინარეობისას საფეხმავლო გიდების საერთაშორისო სტანდარტებით გადამზადებაც მოხდა. გარდა ამისა, დონორების დახმარებით, რეგიონებში ტურიზმის სექტორში მომუშავე მეწარმეების მხარდაჭერაც ხდება.
---
“პროექტი “GRETA” მდგრადი სამთო ტურიზმის განვითარების თვალსაზრისითაც მუშაობს. ამ კუთხით 32 მცირე და საშუალო მეწარმე გვყავს, რომელსაც მხარს ვუჭერთ. მხარდაჭერა კი გამოიხატება იმაში, რომ მაგალითად, ვეხმარებით თავიანთი ობიექტების აღჭურვაში, რათა ტურისტებს თავიანთი სერვისები შესთავაზონ", - გვიყვება პროექტის ხელმძღვანელი რიკარდო მონტარანარი.
ცნობისთვის, პროექტი “GRETA”, ქვეყანაში ბიზნეს-გარემოს გაუმჯობესების ხელშეწყობას ისახავს მიზნად, რითაც დამატებითი შემოსავლის შექმნის შესაძლებლობას საქართველოს ეკონომიკის ორ ისეთ სექტორში ზრდის, როგორიცაა სამთო ტურიზმი და ორგანული სოფლის მეურნეობა.
მასალა მომზადებულია BMG-ს მიერ, წარმოადგენს მის ინტელექტუალურ საკუთრებას და არ გამოხატავს ევროკავშირის, შვედეთის და ავსტრიის შეხედულებებს.
ავტორი:ანუკა ჯოხაძე